ایخدا گون گئچدی قالدی حسرتیم

اولمادی  قبری  حسینون  قسمتیم

اولموشام بیر عومریدور دیوانه سی

عاشق  شوریده  و   مستانه سی

عومر آزالدی آلدی الدن صبریمی

گورمدیم یارب حسینون قبرینی

چوخلاری پروانه دور حق شمعینه

منده گلدوم قاره کوینک جمعینه

کیم مگر باغ ولانی ایستمز

هانسی عاشق نینوانی ایستمز

باغ رضواندور او آلتی گوشه قبر

قلبلرده قویمیوبدی ذره صبر

هانسی دیوانه بلانی ایستمز

کیم مگر کرب و بلانی ایستمز

کربلا     میعادگاه    وصلدور

وصل جانان فیکر ایتمه سهلدور

هر نمازیمده واریمدی زمزمه

ایخدا چاتسون الیم نهر علقمه

ازبریم اولموش دیلیمده بو دعا

قسمتیم ایکاش اولیدی کربلا

هئچ دیین یوخ کربلانی نیلوسن

هئچ مگر اوز حالیوی سن بیلموسن

گوزیاشی گرچی اودی خاموش ائدر

اولماسا ایمان ولی ویرمز ثمر

قیل نمازین واجباته ائت عمل

کسب و کارینده حساب ائت فی المثل

باخما سن بازاریده دوربره

ائت قبول ذرة خیرا یره

گئجه نی صبحه کیمی هیئتدییم

چون وظیفه بولمورم غفلتدییم

ملتی هرگون بازاردا تولارام

دوز یالان بیر دفعه سوزده قالمارام

بیست و یکم باشه قاره باغلارام

آیری گونلر هئچ نمازه دورمارام

بیر ایلی اصلن  کفیمندن قالمارام

لیک عاشوراده شربت پایلارام

باشیوه دگسون سنون بو شربتین

سیندروبسان سن حسینون نهضتین

باشیوه ویرما یالاندان آغلاما

بوشلونون بورجون  اضافه ساخلاما

شاه دین جاندان گئچوب ایمان قالا

نه کی بیر عده لره عنوان قالا

گئت اول پاک ائت اوزون مرداریدن

یغ ربا پوللاریوی بازاریدن

ویرمه مجلسده ربا خواره یرین

هرکسیله اولما یولداش چوخ شیرین

قویما مسئول اولسون هر بیر کاره لر

هیئتی ویران ایده ر بد کاره لر

کربلا افضلدی گرچی کعبه دن

دفن اولوب یتمش ایکی باشسیز بدن

اولماسام عارف به حق مولایه من

دوشموشم بیر زحمت بیجایه من

نوحه خواندا درک ایتمور مطلبی

قورتارا وقت اذاندا هیئتی

روز عاشوارا نیاز ایتدی حسین

قانلی میداندا نماز ایتدی حسین

شاه دین ایتدی نمازینه قیام

اوخ قباقینده دیوب ذکر و سلام

مستحبلر واجباتی گیزلدوب

هر کس اورگتسه یالاندان اورگدوب

بی نماز عاشقلری نیلور حسین

فیکر ائدورسن نیتون بیلمور حسین

اول حقیقی شه مجازی ایستمز

هرکس اولسون بی نمازی ایستمز

ایخدا ای کربلانین صاحبی

کربلاده پاک قانین صاحبی

کربلانی عارفانه ایستورم

بیر زیارت خالصانه ایستورم

کربلانی ایستورم من بی ریا

نیلورم اولسا پولوم پول ربا

کربلانی ایستورم اما نه عاق

تا منی مولا حسین ائتسون قوناق

کربلانی ایستیر اهل نماز

چون حسین قاندان الوبدی دستماز

من دئمم گلمه عزیزیم هیئته

گل ولی ساتما ئوزون هر قیمته

بیل کیمه خاطر قرا نی گیمیسن

دوز گلوب باب نجاتی دوگموسن

بو قرا پرچملره محکم یاپش

حق یولون دا ور قدم حقدن دانش

بو حیسن بحر بلا کشتیسیدور

روز محشر شیعه نون منجی سیدور

واجب ایلوبدی بهشتی لم یزل

 هرکیمه اغلار حسینه با عمل

کیم حسینه اغلیوب یا اغلادا

روز محشر فاطمه (س) قویماز یانا